Македонскиот премиер Зоран Заев најави барање одговорност за бегството на Сашо Мијалков откако ќе се знаат сите детали за случајот. Тој тврди дека со Мијалков нема политички договор.
„Народот бара и очекува правда. Се случи уште едно бегство“, изјави денеска пред новинарите македонскиот премиер Зоран Заев, кој рече дека е разочаран што Сашо Мијалков не е пронајден и не е однесен во домашен притвор.
Заев бара од институциите да ја спроведат судската пресуда и да го пронајдат Мијалков. Тој очекува детали од сите надлежни за овој случај и, како што вели, ако некаде биле констатирани пропусти, ќе се бара одговорност:
„Очекувам детални информации и истрага за самиот случај од судот, јавното обвинителство и од МВР. Нашиот народ очекува целосно расветлување на ваквиот случај и понесување одговорност ако не се спроведе судското решение за ставање во притвор на лице за кое се очекува да се донесе пресуда за еден од најважните случаи во РС Македонија, а тоа е разрешницата преку пресуда на Основен суд за случајот со прислушувањето или таканаречен ‘Таргет-Тврдина’“, рече премиерот.
Тој додаде дека ќе побара одговорност кога ќе се дознаат сите детали.
„Синоќа судот дал наредба за домашен притвор во 18:30, по што во Бирото за јавна безбедност е примена наредбата и веднаш се преземени дејства. Ред е да ги видиме деталите и ако има каков било пропуст, што не е дозволиво, ќе побарам одговорност, рече Заев.
