Асоцијацијата на специјализанти и млади лекари оди на Уставен суд. Во документот кој го објавија и на Фејсбук е наведено дека покренуваат иницијатива за поведување постапка за оценување на уставноста и законитоста на подзаконски правен акт.
Бараат да се оцени уставноста на владината одлука со која „Се забранува користење на годишни одмори, платени и неплатени отсуства од сите вработени лица во здравствениот сектор“.
Од АСМЛ посочуваат дека срамота е тоа што некои лекари се оставени без одмор во пандемија што трае над 1 година, а тие се први на удар, додека други се позаслужни граѓани.
-Срамота е што лекари дежураат без пари во сред пандемија, што немаат здравствено и социјално осигурување а пратениците си земаат плата и надоместоци и не одат да изгласаат промена на таквата состојба. Срамота е што лекари акумулираат функции и што молчат за неправдата кон лекарите. Срамота е што нашата Лекарска Комора не ги заштити матичните лекари. Дури ниту се заложи за нивна заштитна опрема. Срамота е што колеги работат против колеги, а уште посрамота е што работат и против медицината базирана на докази и никој не сносува одговорност. Срамота е што немаме вакцини, ниту јасни протоколи, што нема клексани, што се трошат антибиотици како слатки. Срамота е што во 30 години независност немаме Клинички центар и централизирана терциерна заштита и едукација. Здравствениот систем мора да се реорганизира и мора да се вложи во него за да стане одржлив за сите, велат од АСМЛ.
Министерот за здравство Венко Филипче вчера истакна дека нема барања за користење на годишни одмори од здравствените работници.
-Точно е дека препораката е да не се користат годишни одмори, но навистина здравствени работници се свесни и совесни во својата работа и практично барање за годишен одмор или за одмор, колку што сум информиран, и да нема. Тоа значи дека сите се целосно посветени на пациентите, сите се свесни и херојски ја извршуваат својата задача. Таму каде недостасува кадар се надополнува од други здравствени институции, посочи Филипче.
Од Лекарската комора пред два дена ги повикуваа сите граѓани да ја препознаат сериозноста на ситуацијата во која се наоѓаме предизвикана од ширењето на Ковид-19 и со заеднички придонес и делување да им помогнат на лекарите во борбата за заштита на индивидуалното и колективно здравје, бидејќи тоа е единствениот начин да се спречи понатамошното ширење на вирусот и да се избегне колапс на здравствениот систем.
– Паралелно растат и бројките на пациенти кои поради сериозноста на здравствената состојба и компликациите предизвикани од Ковид-19 имаат потреба од болничко лекување. Капацитетите на болниците речиси се исполнети, секојдневно бараме дополнителен кревет за згрижување на тешко болните. Голем проблем за одржливоста на здравствениот систем претставува и намалувањето на бројот на активни здравствени работници, бидејќи и меѓу нив расте бројот на заразени и на оние кои се во самоизолација, а дополнително е и тоа што се соочуваме и со премореност, бидејќи епидемијата трае многу долго. Голем дел од кадарот кој работи во ковид – центрите одамна не работи по систем на ротации, а многу здравствени работници немаат користено годишен одмор. Во услови на намален број на здравствени работници и непостоење на начин за кратко време тој да се зголеми станува јасно дека помал број на лекари, медицински сестри и болничари треба да се грижат за значително поголемиот број пациенти што неминовно влијае на квалитетот на здравствената нега која се добива, истакнуваат од Лекарската комора.
