Поранешен лидер на демократското мнозинство во американскиот Сенат и член на Конгресот од Невада со најдолг стаж, Хари Рид, починал на 83-годишна возраст.
Рид, поранешен боксер кој стана адвокат, беше лидер на мнозинството во Сенатот од 2007 до 2015 година, истакнат политичар на крајот на мандатот на Џорџ Буш и во два мандата на Барак Обама.
Американскиот претседател Џо Бајден изјави дека во текот на двете децении што ги поминале заедно во Конгресот и осум години заедничка работа додека беше потпретседател, Рид отсекогаш бил човек од збор.
Рид се пензионираше во 2016 година, откако го загуби видот на едното око, а во мај 2018 година му беше дијагностициран рак на панкреасот.
Тој почина во вторникот, опкружен со пријателите, дома во предградието на Хендерсон, по храбра, четиригодишна битка со ракот на панкреасот – соопшти неговата сопруга Ландре Рид.
Пред неполни две недели, меѓународниот аеродром во Лас Вегас, којшто од 1948 година се викаше аеродром Мекаран, по поранешниот американски сенатор од Невада, Пит Мекаран, е именуван по Хари Рид.
