Во Тетово, град каде има неколку етнички заедници, во повеќе области и активности постои соработка и заедништво. Позитивен пример на тандем што ги надминува поделбите се Албанецот Дритон Дикена и Македонецот Владимир Петровски, кои водат свои здруженија како пчелари, а три години по ред се обединуваат и заедно го организираат првиот и единствен меѓународен натпревар за квалитетен мед Tetovo honey awards, како и манифестациите „Слатките денови на Тетово” и „Паркот на пчелите”.
Дритон има 45 години, работи како правник во Исламска верска заедница, а на кафе средби пие еспресо и пуши цигари. Владимир е помлад за една година, полициски инспектор, не пуши, а сака макијато, дополнително хоби му е ловџиството. Иако се со различна религиозна и етничка припадност, сите тие разлики не се важни за нив, затоа што, како велат, ги соединува заедничката љубов кон чувањето и работата со пчели и мед.
Пчеларството на двајцата им е хоби, Владимир се занимава околу десет години, а Дритон неколку години помалку. Од кога започнале да соработуваат сметаат дека заеднички можат да подобро да ги надминат предивните и да достигнат повеќе успеси.
Се запознале на еден од семинарите и обуките за пчеларство. Уште првите разговори кои ги направиле биле за големи проекти за развој на пчеларството меѓу кои и натпреварот за квалитет на мед што подоцна и го реализираат.
– Сепак првиот пат кога заедно се обидовме и аплициравме до меѓународна организација за грант за развој на пчеларство бевме одбиени. Сепак не се поколебавме во идеите дека заедно можеме да постигнеме повеќе. Така со натпреварот за квалитет на мед не само што станавме препознатливи во Тетово, туку и низ цела дражва па и на Балканот и Европа, вели Владимир.
Двајцата имаат ист однос кон пчелите и пчеларството, што е суштина на нивното заедништво и тоа што ги соединува. Велат дека за да се занимаваш со пчеларство потребно е кон пчелите да има повеќе љубов од математика. Поточно дека грижата која ја имаат за пчелите е поголема од нивната желба за поголем профит.
– Јас мислам дека Платон бил пчелар. Во тоа време да ја пишеш книгата „Држава”, тоа е како да го опишуваш животот на едно пчелно семејство. Тоа се високо напредни суштества. Сакаат ред и мир, како полицајци и затоа се заљубуваме во нивната совршената природа. Јас кога почнав пред седум-осум години, ми се разбуди некој детски сон, сме растеле со пчели околу нашата куќа, бидејќи комшиите имале пчели, па тоа воедно е една идеја која потекнува од љубов а не од некаков материјален интерес, објаснува Дритон.
И Владимир се надоврзува дека иако пчеларство го имаат како хоби, она што како луѓе ги тера да истраат во предизвиците е желбата да ги чуваат пчелите живи и здрави.
– Откако ги засакав пчелите, почнав да го анализирам нивниот живот и кога сфатив како функционираат и егзистираат сметам дека не е важно колку материјално се губи, туку најважно ми е трудот да резултира со тоа да останат пчелите живи и здрави, рече Владимир.
Кога почнувале да дејствуваат заедно договориле едно правило дека општиот заеднички интерес е на прво место, а не личниот. Поткрепа на тоа дека ова е едно хоби и со тоа треба да бидат среќни, а не да бидат алчни.
Како и дали нивното заедништво испраќа порака до општеството, ги прашувам двајцата, и како ги надминуваат ваквите предизвиците кои се првенствено лични, но и колективни,
– Другите луѓе гледаат и знаат дека ние сме Македонци и Албанци, но ние меѓу нас за тоа никогаш не сме зборувале. Нема потреба. Ние сме пчелари, пчелата нема нација и вера, тоа не соединува. Тоа што сме Албанци и Македонци е колоритот и убавината на соработката. Ние вака даваме пример во општеството дека се дружиме за повисоки цели. Не е проблем соработката меѓу различните по разни основи. Кога имаш повисока цел можен е успехот, вели Дритон.
Владимир потсетува дека медот ги обединува не само нив туку и другите пчелари. Здружението „Полошки мед” кое тој го раководи, како и „Градот на пчелите” исто така е составен од членови кои се разликуваат по етничка, религиозна, возрасна, професионална припадност.
– Политика ги прави поделбите и интересите. Медот и пчелите се едни од работите што ги соединуваат сите. На состаноци се зборува и македонски и албански јазик. Нема препреки. Гледаме од агол на заеднички развој на нештата и така треба да биде во секој сектор во општеството. Луѓето имаат одличен впечаток што работиме заедно, даваме позитивен импакт. Во самите нашите здруженија имаме разни членови и таму интерно соработката исто така се одвива во насока кон заеднички достигнувања, вели Владимир.
Со нивните примери се надеваат дека ќе постигнат и родово обединување. Со оглед дека ретко жените се занимаваат со пчеларството сакаат со активностите да ги поттикнат се повеќе да ја одберат оваа дејност.
– Се обидуваме да пласираме нешто ново – природна козметика од мед. Сметаме дека има простор жените да најдат привлечност преку козметиката да почнат да одгледуваат пчели. Со помошта што ја добиваме од нашите сопруги согледуваме дека жените дури се поспособни за некои работи од мажите, како пресадување на матици, што е многу детална и прецизна работа за која сметаме дека е доблест кај жените, велат и двајцата давајќи примери кога заедно дома работеле со сопругите.
Двајцата се задоволни што во време кога во нашата држава голем предизвик е загадениот воздух со нивната работа придонесуваат за подобрување на работите.
Манифестацијата „Парк на пчелите” е период кога пчеларите кои доаѓаат во Тетово на изложбените саеми или натпреварот, садат по едно дрво чии цветови се дел од процесот за создавање мед како костен, багрем и липа. Ги садат покрај градската река, што претставува обид на тетовските пчеларите да придонесат и за почист воздух во градот.
