Градоначалничката на Град Скопје, Данела Арсовска одржа средба со претставници на градските јавни претпријатија и претставници од урбаните и местни заедници од Ѓорче Петров во Центарот за култура каде беа детектирани проблемите на жителите на оваа населба, што се под ингеренции на Градот, со цел што поскоро решавање на истите.
-Од страна на претставници на заедниците во Ѓорче Петров на Арсовска и службите им беа презентирани проблеми со акцент на градските улици, нивно уредување или пробивање, осветлувањето, водоснабдувањето, уличните кучиња, проблеми со броевите на куќите итн.
-Со градоначалничката се согласивме вакви координативни средби со Градот да станат пракса во иднина. Целта е да поставиме соодветни проекции и насоки, да се соочиме со предизвиците и активно да работиме на подобрување на секојдневнието на граѓаните. Заеднички ги сослушавме граѓаните и сите нивни предлози ќе бидат ставени на разгледување. Вложуваме максимални напори за што повеќе затворени прашања во иднина.
Месните и урбаните заедници во Ѓорче Петров се нефункционални во последните години што е одраз на несериозен пристап од страна на претходното локално раководство. Но, тоа е состојба која ја оставаме зад нас. Планиран е наскоро нов избор на раководни лица со што овие простории ќе станат филтер на информации и конечно ќе бидат во функција на граѓаните, напиша градоначалникот на Ѓорче Петров, Александар Стојкоски на својот Фејсбук профил.
