Отворените прашања треба да се решаваат во целина, што треба да претставува одредена рамка, која пак ќе биде поврзана со кревањето на ветото од бугарска страна и одржување на првата меѓувладина конференција на Северна Македонија со ЕУ, брифира денеска премиерот Димитар Ковачевски за македонските новинари по завршувањето на меѓувладината седница на двете држави, која се одржа во Софија.
Како што јави известувачот на МИА од Софија, во врска со можноста за одвојување на прашањата од сега пакетот 4 плус 1 откако кусото име Северна Македонија беше решено за време на посетата на Петков во Скопје, Ковачевски напомена дека прашањата ќе одат во еден пакет, но, оти секое од нив има своја динамика на решавање.
Како што истакна премиерот, при решавањето на политичките прашања со Софија треба да се придржуваме до Резолуцијата која е донесена во Собранието на Северна Македонија и поддржана од сите политички партии, нагласувајќи оти точките не треба да се гледаат како тешки и лесни доколку постои подготвеност за постигнување компромис.
Ковачевски, брифингот, го одржа по средбата со бугарскиот претседател Румен Радев, кој на разговорите, како што истакна премиерот, го реафирмирал ставот во однос на политичките прашања на бугарската страна. Но, напоменал и дека го поддржувал новиот импулс на дијалогот кој го даваат двајцата нови премиери.
Во однос на неговиот впечаток од средбите што ги имаше денеска и вчера во Софија, за тоа дали има приближување меѓу двете страни во однос на пакетот политички прашања, Ковачевски брифираше дека на разговорите на заедничката седница воопшто не се разговарало за тие прашања. Тоа, рече, е работа на министерствата за надворешни работи кои го имаат целосниот капацитет и ќе се посветат на приближување на позициите меѓу двете држави.
Премиерот Ковачевски истакна дека решението меѓу двете земји пред се треба да биде базирано на европските вредности, во интерес на граѓаните на Северна Македонија и на Бугарија, да биде институционално поддржано од двете страни и да доведе до одржување на првата меѓувладина конференција.
За тоа дали постигнатото решение би било вметното во Договорот за добрососедство или би се носел евентуален нов договор, како и за тоа дали би се дало на одобрување во Собранието, Ковачевски истакна дека тој е легалист и оти сите одлуки ќе се носат согласно законите. Нагласи дека има одлуки кои ги носи Владата, има одлуки кои ги носи Собранието, и има одлуки кои ги потпишува претседателот.
Во овој момент не сакаше да прецизира повеќе детали, нагласувајќи дека сега најбитно е да се активира работата на работните групи, да се продолжи по патот на приближување на двете земји преку преземање на практични чекори и реализација на конкретни проекти, бидејќи како што рече, меѓу земји меѓу коишто не постои комуникација тешко е да се постигне какво било решение.
Во однос на вметнувањето на Бугарите во Уставот, Ковачевски нагласи дека тоа е процес што треба да ги помине сите фази кои предвидуваат промена на Уставот и нагласи дека таа промена ќе биде поврзана со евроинтегративниот процес во земјата.
Во однос на заштита на малцинствата, истакна дека ситуацијата во нашата земја е јасна, дека индивидуалните права се остваруваат колективно, но оти има држави во коишто тоа не е случај каква што е Бугарија. За тоа дали воопшто на средбите станало збор за македонското малцинство, Ковачевски брифира оти во случајот со Бугарија постојат и други механизми за заштита на нечии права во однос на нивното самоопределување, разни меѓунардони институции како што е Советот на Европа.
