Министерката за култура Бисера Костадиновска-Стојчевска денеска, во рамки на престојот во Крушево, ја посети Спомен-куќата на Тоше Проески на Гумење.
Според Костадиновска-Стојчевска, споменот за Тоше говори за трагите на нашето постоење.
– Ако трагите што ги оставаме зад себе говорат за нашето постоење, тогаш споменот на Тоше, на неговиот глас и дело засокогаш ќе продолжат да живеат меѓу нас, рече министерката.
Таа беше информирана за активностите на оваа национална установа во која се изложени над 350 експонати кои ја раскажуваат приказната за детството, подемот и врвот на кариерата на македонската музичка икона Тоше Проески.
Костадиновска-Стојчевска се запозна и со настаните со кои беше одбележана десетгодишнината од отворањето на објектот кој има огромна посетеност, како и со идните активности, меѓу кои и проектот планиран за 15-годишнината од заминувањето на Тоше Проески.
Министерката положи цвеќе на спомен-обележјето и на вечното почивалиште на македонската икона Тоше Проески, кое со поддршка од Владата беше изградено минатата година и претставува само мало оддолжување за сето она што Тоше го направи за нашата земја.
Во рамките на престојот во Крушево, Костадиновска-Стојчевска ја посети и галеријата на доајенот на македонското ликовно творештво Никола Мартиноски. Се запозна со највредните дела од творештвото на една од најистакнатите фигури на македонската култура во 20 век. Преку етнолошката поставка, пак, Костадиновска-Стојчевска се запозна и со македонскиот начин на живот и со народното богатство на Крушевскиот регион.
