Зимските олимписки игри, што свечено ќе бидат отворени утре во Пекинг, ќе влезат во историјата како први на кои ќе настапи Саудиска Арабија, под чие знаме ќе се натпреварува Фаик Абди во алпско скијање.
Абди (25) се квалификуваше за настап во велеслалом, објави денеска официјално Саудискиот олимписки комитет на својот твитер профил.
– Пресреќен бев кога ја добив пораката од својата федерација. Сега треба да продолжам да тренирам, да останам приземен и скромен, изјави Абди за локалните медиуми, додавајќи оти е горд што ќе ја претставува Саудиска Арабија во Пекинг.
Абди првпат застанал на скии на четири годишна возраст, а за време на своето скијачко патување тренираше во многу земји, вклучувајќи ги Австрија, Италија, Швајцарија, Шведска и Црна Гора. Саудискиот олимпиец од 2016 до 2020 година студираше кривично право на Универзитетот Јута во Солт Лејк Сити, каде ги усовршуваше скијачките техники.
– Сакам брзо да скијам и затоа го одбрав алпското скијање, кое е исклучително технички и напорен спорт, изјави Абди.
