Првиот христијанин именуван за претседател на највисокиот суд во Египет денеска положи свечена заклетва пред претседателот Абдел Фатах ал Сиси.
Булус Фахми е именуван за главен судија на Врховниот уставен суд со указ издаден од Ал-Сиси, објави електронското издание на државниот весник Ал-Ахрам, пренесува ДПА.
Фахми (65) претходно ја извршуваше функцијата заменик шеф на истиот суд.
Судијата Булос Фахми е 19. личност што претседава со Врховниот уставен суд од неговото формирање во 1969 година. Претседателот Абдел Фатах ел-Сиси го избра Фахми меѓу петмината најстари од 15-те судии на судот, како што е пропишано со закон.
Мушира Катаб, шеф на Националниот совет за човекови права назначен од Владата, ја поздрави одлуката како „историска” и „џиновски потег” на полето на политичките и граѓанските права.
Сепак, Исак Ибрахим, истакнат експерт за христијански прашања во Египет, во објава на Фејсбук оцени дека потегот ќе има мало влијание врз ставањето крај на дискриминацијата врз христијаните бидејќи тие се исклучително недоволно застапени во државните институции на Египет.
– Тоа нема да има значително влијание врз елиминирањето на дискриминацијата и обезбедувањето можност за правда и еднаквост за сите граѓани”, напиша тој.
Египет ја има најголемата христијанска заедница на Блискиот Исток, со околу 10 отсто од претежно муслиманското население во земјата со повеќе од 100 милиони жители.
Египетските христијани долго време се жалат на прогон и исламистички напади.
