Во околината на село Стојаково, вчера во 01.40 часот полициски службеници од Полициската станица за граничен премин Богородица пронашле 19 лица – мигранти, од кои 16 од Индија и тројца од Пакистан.
– По преземени мерки било утврдено дека лицата М.О.(31), А.А.(21) и М.А.(22), сите од Пакистан, лажно се претставувале дека се од Индија, а всушност биле водичи на групата која откако ја прифатиле имале намера да ја пренесат во Република Грција, информираа денеска од МВР.
За случајот е запознаен Јавен обвинител од Основното јавно обвинителство за гонење на организиран криминал и корупција, по чија наредба трите лица биле лишени од слобода и приведени во Полициска станица Гевгелија.
По целосно документирање на случајот против нив ќе биде поднесена пријава по член 418 од Кривичниот законик, а во текот на денот ќе бидат изведени пред Судија на претходна постапка при Основен суд Скопје 1.
Останатите 16 лица мигранти биле сместени во Прифатниот транзитен центар „Винојуг” за понатамошна постапка.
