Повеќе од 2.500 здравствени установи се во сериозна егзистенцијална криза, на раб на опстанок. Матичните лекари за 63 денари во месецот треба да дадат неограничен број улсуги, 24 часа, седум дена во неделата. Нема почитување на работните односи, реагира денеска Комората на приватно здравство.
Комората очекува да седне на маса со надлежните за да се надмине, како што вели, проблемот со постојаното минимизирање и обезвреднување на трудот на здравствените работници – матичните лекари, гинеколозите, стоматолозите и фармацевтите.
-Мора да се најде компромис. Во спротивно, државата нека излезе и нека каже дека нема потреба од доктори. Но, пациентите имаат, луѓето. Нашата дејност е од јавен интерес. Итно треба да се седне со Фондот и да има дијалог, а не монолог. Не зборуваме за рушење на здравствениот систем, во никој случај, туку за изнаоѓање соодветни решенија. Веќе има најави за затворање на здравствените амбулатни, посебно во помалите средини. Сметките за струја што ги добија се енормно високи, 20.000 – 30.000 денари. Дополнително, 160 отсто е поскапено и горивото од 2001 година, а капитацијата е 63 денари, беше речено на прес-конференцијата.
Според Комората, време е да се афирмираме и да се врати довербата во професијата доктор, стоматолог и фармацевт.
-Светот воведува роботика, а ние уште се занимаваме со капитацискиот бод. Со Фондот за здравство во делот на апетките последните преговори беа во 2014 година, а со останатите здравствени установи во 2018 година. Во меѓувреме ништо не е сменето и наместо награди, добиваме казни. Меѓу фактите со кои се соочуваме денес е и тоа што денталните протези ги изработуваме за 50 отсто поевтино од цената во 1992 година, а познат е и проблемот со иселувањето на докторите. Од корона пандемијата, пак, доживеавме сериозен удар. Голем дел од товарот падна на матичните лекари, приватните здравствени установи и аптеките. Се случи една нелогичност која не постои никаде во светот – во услови на пандемијата матичните лекари да бидат казнувани, наместо наградувани. Но, испливаа на површина и други проблеми. Здравствениот систем е се уште во криза и мора да се изнајдат решенија, подвлекоа лекарите од приватното здравство, истакнаа од Комората.
Комората најави дека од следната недела ќе профункционираат работните групи и преговарачките тимови во кои има и правни и економски експерти.
-Целта е директно да учествуваме во законската регулатива која досега се носеше зад затворени врати, без контактирање на фелата, посочија приватните лекари.
На новинарско прашање колку приватни здравстени установи има во земјава, одговорија дека засега нема точна бројка, но бројката се проценува на 4.500. Притоа, од овие здравстени установи, само 10 – 20 работат со КОВИД тестирање.
Во врска со поскапувањата поради КОВИД-от, приватните лекари појаснија дека материјалните трошоци и цените на лековите, маските, ракавиците, дезинфекциските средства се зголемени за 80, 100 или 200 проценти, но тоа, нагласија, нешто што го диктира пазарот.
-Како што се намалува цената, така и ние ги намалуваме цените. Тоа го диктира пазарот. Нашата улога е да обезбедиме превенција и добра услуга за пациентите, потенцираа од Комората.
Во Комората на приватно здравство учествуваат приватните здравстени установи од сите сектори, општи лекари, стоматолози, апетки и веледрогерии, различни медицински специјалистички ординации и други правни субјекти. Тие најавија дека еден од следните чекори ќе им биде дигитализација на системот што, меѓу другото, подразбира и електорнско издавање упати.
