РС Македонија во текот на оваа недела очекува одговор за поднесените апликации за четири проекти за поддршка преку програмата на Европската комисија за поддршка на Западен Балкан.
Ова го соопшти министерот за финансии Фатмир Бесими по завршување на средбите во Брисел, потенцирајќи дека земјата има аплицирано со четири проекти од областа на транспортот, животната средина и енергетиката и дека се очекуваат резултати дали тие би биле поддржани и во колкав износ.
– Со Планот за забрзан економски раст планирани се во наредните пет години 4 милијарди евра инвестиции од јавниот сектор и дополнителни 8 милијарди евра од приватниот сектор. Овие планирани инвестиции и нивното поврзување со Европскиот инвестициски план и можноста за нивна поддршка беа тема на средбите во Брисел, се наведува во соопштението од Министерството за финансии.
Европската инвестициска програма, како што стои во соопштението, предвидува инвестиции од девет милијарди евра во Западен Балкан во период од 2021 до 2027 година, и дополнително 20 милијарди евра средства што можат да се повлечат преку Гарантен фонд од приватниот сектор.
