Генералното собрание на Обединети нации со едноминутно молчење за Украина ја отвори специјална вонредна седница на која ќе се дебатира за тоа дали да се осуди руската инвазија врз нејзиниот сосед.
Претседателот на ГС Абдула Шахид пред 193-те членки на ОН повика на „итен прекин на огнот”.
Тој упати апел до вмешаните страните да ја искористат „ретката” можност за дијалог за „смислено и брзо да се деескалира” ситуацијата.
Франција денеска ќе поднесе резолуција во Советот за безбедност на ОН, со која ќе повика на итен прекин на огнот во Украина и гаранции за доставување на хуманитарна помош до цивилите.
Во соопштението од Елисејска палата се додава дека Париз „ќе побара и прекин на огнот, што мора да претходи на какви било мировни преговори”.
Франција е една од петте постојани членки на СБ на ОН, заедно со САД, Велика Британија, Кина и Русија, додека 10 други земји се ротирачки непостојани членки.
