Матичните лекари од Куманово денеска по втор пат примаат само итни случаи, не користеа „Мој термин” и повторно испратија порака до надлежните институции дека остануваат на барањата за поддршка за ублажување на последиците од кризата.
Речиси сите лекари од Куманово не работеа, информираше денеска координаторот на Здружението на матични лекари, д-р Фатмир Асани.
– Пред две недели имавме протест да се задоволат нашите барања, бидејќи досега немавме контакт со работните групи, повторно денеска одлучивме да не работиме според „Мој термин”. Ги примаме само итните случаи, а другите за жал ги враќаме, што не е популарно, меѓутоа сме принудени. Нашите барања се Владата финансиски да ни помогне да ни го качи бодот, целото здравство да функционира електронски, да нема веќе упати, рецепти, картони. Некој режим на лекови да се поправи, за да не мораме еден пациент за еден лек да го праќаме на секундарно и терцијарно здравство, да можеме директно да го пишуваме, бидејќи сметаме дека сме обучени за такво нешто, изјави Асани.
Матичните лекари бараат укинување и на казнената политика, правила на лекување на хронично-болните пациенти, зголемување на бодот. Асани посочи дека во исклучително лоша состојба се 14 лекари од Куманово и за нив е можно дури и затворање на ординациите и оставање на пациентите без лекарска грижа. Матичните лекари од Куманово велат дека биле во првите борбени редови во борба против коронавирусот и дека е важно да им се излезе во пресрет во однос на сегашните барања.
Во Куманово има околу 100 ординации.
