Да не беше Договорот од Преспа, на северната граница Грција сега ќе ги имаше Русија и Турција, на север ќе имавме Либија, истакна лидерот на СИРИЗА Алексис Ципрас во интервју за грчката телевизија „Антена”.
Како што јави дописничката на МИА од Атина, поранешниот грчки премиер го повтори неговиот став дека со решението на спорот запрело влијанието на други земји.
– Замислете денес што ќе имавме на нашата северна граница, ако не го склучевме овој Договор. Не само што Грција немаше да биде таа која ќе има земја сојузник за да го надгледува воздушниот простор со грчките воени авиони, туку ќе ги имавме и Турција и Русија на нашата северна граница. Ова ќе го имавме. Ќе имавме Либија на нашата северна граница. И да видам колку ќе беше лесно да правиме потези во рамките на неопходното, па дури и прекумерни потези, ако ја имавме Русија на нашата северна граница, истакна Ципрас.
Одговарајќи, на како што рече, сегашните критики од Нова демократија за поврзаност со Русија, Ципрас се осврна на периодот кога беше премиер и истакна дека иако три пати беше во официјална посета на Русија, а рускиот претседател ја посети Грција и постоел отворен дијалог со Москва, сепак биле протерани руски дипломати и граѓани во врска со Договорот од Преспа.
– Кога грчките служби ми дадоа податоци дека постои интервенција во земјата од руски дипломати, бизнисмени или граѓани во врска со Договорот од Преспа за поттикнување протести во земјата, не се двоумев тогаш да ги протерам, да ги протераме овие граѓани и дипломатите. Потег, за кој тогаш Нова демократија, која денес не критикува, тогаш беше исклучително воздржана и ни велеше не ја мешајте надворешната политика, Русија е многу важна земја за да се судрите, нема врска со Договорот од Преспа, рече Ципрас.
Во однос политиката што ја води актуелната грчка Влада за ситуацијата во Украина, лидерот на СИРИЗА рече дека земјата мора да има јасна позиција, а не да биде неутрална, кога постои инвазија и прекршување на меѓународното право и упати критики за одлуката да се испрати воен материјал.
– Сметам дека е огромна грешка и несериозност на премиерот фактот што побрза со доставување воен материјал во Украина, а можеше да биде, не материјал за битка, туку за зајакнување на хуманитарната помош, на воените болници, било што друго. Побрза, нашата земја, од земја инволвирана во мирот, да се инволвира во војна. Ова е погрешно, објасни лидерот на СИРИЗА.
