Наполно свесен за големината на улогата што ја има жената низ годините, улога која ве позиционираше како вистински архитекти на модернoто општество. Вашата интуитивност, епматичност, развиеното чувство на претпазливост и одговорност се само дел од уникатните карактеристики кои ја создаваат вашата додадена вредност во работната средина и во општеството во целост. А наша задача, како креатори на политики е зборовите да ги претвориме во акција за економска и социјална рамноправност, за правична застапеност, што не е задача за само еден ден во годината.
Ова стои во честитката од министерот за внатрешни работи Оливер Спасовски до претставничките на полицијата и вработени во МВР по повод Меѓународниот ден на жената – 8 Март, кој претставува симбол на борбата за права и за еднаквост на жените во целиот свет. Токму во поглед на родовата рамноправност и правичната застапеност, додава Спасовски, во последниве неколку години многу работи придвиживме во МВР.
-Се зголемува бројот на жени кои се на раководни позиции, можеме да се пофалиме со жени кои се вклучени во Одделот за специјални полициски операции, поточно во Единицата за брзо распоредување, Специјалната антитерористичка единица „Тигар” и Хеликоптерската единица, што порано не беше случај. Со секоја генерација се зголемува и бројот на жени – кандидатки на огласите за полицајци, кои се упатени на обука по извршена селекција, благодарение на имплементираниот родов концепт, а имплементиравме и систем на еднакви можности при стручно усовршување, што подразбира родово разделена евиденција. Се работеше и на подигање на родовата свест преку менторски програми за родова еднаквост, наведува министерот Спасовски.
Новиот Колективен договор, потенцира тој, е прв колективен договор во државната управа кај нас, во кој се употребува родовиот речник и терминологија. Во низата новини во Колективниот договор предвиден е паричен надомест во висина од 100 евра во денарска противвредност за секое новородено дете на жените вработени во МВР кои ќе се реализираат како мајки.
-Нашата цел се задоволни полициски службенички и службеници со кои можеме да претендираме на уште подобри резултати во работењето во полза на сите граѓани. Само така, со заеднички заложби и учество во овие процеси ќе го зајакнеме општеството на еднакви граѓани и граѓанки по сите основи, стои во честитката по повод 8 Март – за родово еднакво општество, порачува министерот Спасаовски
