Израелските сили денеска се судрија со борците на Хамас во неколку области на Појасот Газа, а палестинските здравствени власти соопштија дека најмалку 50 лица загинале во израелските бомбардирања на јужните и централните области.
Палестинската исламистичка милитантна група Хамас го обвини Израел за интензивирање на нападите во Газа за да се обиде да ги попречи напорите на арапските посредници и САД да постигнат договор за прекин на огнот.
Израел тврди дека се обидува да ги искорени борците на Хамас.
Во Рафа, јужниот пограничен град во кој израелските сили оперираат од мај, пет Палестинци беа убиени во воздушен напад врз куќа, соопштија здравствените власти во Газа. Еден маж, неговата сопруга и двете деца беа убиени во блискиот Kан Јунис.
Подоцна денеска, најмалку 13 Палестинци загинаа во израелски воздушен напад врз возило, а 26 беа ранети во одделен напад во Kан Јунис.
Неколку часа подоцна, во израелски воздушен напад врз училиште во кампот Нусерат загинаа 16 лица, а многу други беа ранети, соопштија здравствените власти. Нападот бил врз училиште управувано од ОН, во кое биле сместени раселените семејства, објави Министерството за здравство.
Текстот Министерство за здравство на Хамас: Најмалку 50 луѓе загинаа во израелските напади врз Газа е превземен од МАКФАКС.
