Иако е неработен ден, министерот за транспорт и врски Александар Николоски се пофали дека работел и договорил формирање работа група која ќе ги испита можностите за нови евтини летови од скопскиот и од охридскиот аеродром. И тој и Владата се подготвени да дадат субвенции на новите компании со цел да дојдат повеќе туристи во земјава и македонските граѓани да имаат поевтини летови.
„Би сакал да споделам една убава вест со сите вас. Денес иако е недела, интензивно работиме. Донесовме одлука да формираме работна група која ќе ги испита сите можности за зголемување на бројот на летови од скопскиот и охридскиот аеродром. Нашата цел е следната година да има нови дестинации кои во моментов не ги оперираат охридскиот и скопскиот аеродром. Така би добиле многу повеќе туристи но и македонските граѓани полесно и поевтино ќе патуваат надвор. Ќе разговараме со неколку светски компании кои нудат брзи и евтини летови, и убеден сум дека веќе следната година ќе имаме многу повеќе дестинации“, рече министерот Николоски.
По последниот оглас за нискобуџетни летови од Македонија од минатата година, субвенции од државата покрај „Визер“, доби и германска „Луфтханза“. Субвенцијата на странските компании што ја исплаќа нашата држава е седум евра по патник во заминување. Субвенционирањето секоја година е условено со воведување нови линии.
Текстот Николоски договара нови нискобуџетни летови од следната година: Ќе разговараме со неколку светски компании е превземен од МАКФАКС.
