Израелскиот министер за надворешни работи, Израел Кац, одговори на изјавата на турскиот претседател, Реџеп Таип Ердоган, дека Турција може да влезе во Израел како што еднаш влезе во Либија и Нагорно-Карабах.
„Ердоган оди по патот на Садам Хусеин и се заканува дека ќе го нападне Израел. Треба само да се сети што се случи таму и како заврши“, напиша Кац на „Икс“.
Хусеин беше претседател на Ирак од 1979 до 2003 година. Тој беше соборен од западната коалиција предводена од САД. Американците го уапсија, а во 2006 година беше осуден на смрт за злосторства врз Курдите и шиитите. Казната беше извршена со бесење.
Израелците последната изјава на Ердоган ја протолкуваа како закана од инвазија. Односите меѓу Ерусалим и Анкара станаа затегнати откога во октомври минатата година почна војната меѓу Израелците и Хамас.
За разлика од нејзините западни сојузници и некои арапски земји, Турција не го смета Хамас за терористичка организација. Ердоган постојано ги обвинуваше и напаѓаше Израелците. Така, израелскиот премиер Бенјамин Нетанјаху го нарече „касапот на Газа“ и „воен злосторник“.
Текстот Шефот на израелската дипломатија му одговори на Ердоган: Сети се на Хусеин е превземен од МАКФАКС.
