Властите во Венеција планираат да го ограничат бројот на луѓе во туристичките групи на максимум 25 во најновиот обид да го намалат влијанието на метежот врз начинот на живеење на градот.
Локалните власти ќе забранат и користење преносни звучници од туристичките водичи со цел „да се гарантира мирот на жителите на градот“ и да се овозможи послободно движење на пешаците.
Казни од 25 до 500 евра ќе бидат воведени за сите оние што нема да ги почитуваат новите мерки, кои првично требаше да стапат во сила на почетокот на јуни, а беа одложени за почетокот на август. Најновите ограничувања ќе важат за центарот на Венеција и за островите Мурано, Бурано и Торчело.
Во април Венеција стана првиот град во светот што воведе специјален систем за плаќање за посетителите што влегуваат во центарот на градот како дел од експериментот, чија цел е да ги одврати дневните патници да доаѓаат таму во време на шпицот. Пилот-програмата, чија реализација будно ја следат и другите европски туристички дестинации, траеше само 29 дена.
Заврши во јули, но го отвори патот за период на консултации, по што ќе се одлучи како овој проект да продолжи во иднина.
Треба да се напомене дека во случајот со туристичките групи постојат многубројни исклучоци од правилото, пренесуваат медиумите во регионот. На пример, како што стои во написите, децата до две години не се бројат, а ограничувањата не важат за учениците и студентите што пристигнуваат во Венеција во образовна посета или се на студиско патување, истакнува „Ројтерс“.
Текстот Венеција воведува ново правило за туристите е превземен од МАКФАКС.
