Денеска, имало вкупно 20 пожари на отворено на територијата на државата, од нив пет се целосно изгаснати, под контрола се ставени три пожари, а 12 пожари сѐ уште се активни.
„Апелирам до сите граѓани во текот на утрешниот празничен ден да бидат исклучително внимателни, особено доколку се движат во природа за да не предизвикаат пожари, кои може да завршат со катастрофални последици“, рече директорот на ЦУК, Стојанче Ангелов.
Информира дека во текот на денешниот ден на располагање биле неколку домашни летала: еден „ер трактор“ на Дирекцијата за заштита и спасување, како и два армиски и два полициски хеликоптера и еден српски хеликоптер.
До крајот на денот, дополни Ангелов, ќе пристигне и другата меѓународна понош со европскиот механизам за цивилна заштита.
Еден полициски хеликоптер заедно со српскиот хеликоптер денеска дејствувале во реонот на Старо Нагоричане, кај селата Малотино и Рамно.
Овој пожар е на многу тежок непристапен терен, информира Ангелов.
Било дејствувано и во Кратовско и Пробиштипско. Чешкиот хеликоптер, според најавите, треба да дејствува на територијата на Пробиштип и Свети Николе.
„Ангажирани се 160 припадници на Армијата, но дејствуваат и голем број локални пожарникари со поддршка од соседните градови, на многу места помага и локалното население, а на некои места се користат и доброволните противпожарни друштва, кои имаат соодветена опрема, но и обука“, информира Ангелов.
Според него, ваков обем и динамика на пожари сме немале од осамостојувањето на државата.
Главноот штаб за управување со кризи е во постојано заседавање, дополни Ангелов, и тој одлучува за приоритетите за гаснење на пожарите.
„До крајот на денот треба да пристигнат и еден хеликоптер од Словенија, два ‘ер трактора’ од Шведска, два ‘ер трактора’ од Германија и тим од Унгарија од 46 лица со 13 возила, кои може да се движат по тешко пристапни терени“, појасни директорот на ЦУК.
Текстот (Видео) Во државата активни 12 пожари, до крајот на денот пристигнува и другата меѓународна поддршка, најави Ангелов е превземен од МАКФАКС.
