Тимот на Камала Харис се сретна со шест потенцијални кандидати за потпретседател, соопштија два извори блиски до кампањата, објави денеска NBC News.
Меѓу кандидатите се гувернерот на Пенсилванија Џош Шапиро, американскиот сенатор Марк Кели, гувернерот на Минесота, Тим Волц, гувернерот на Кентаки, Енди Бешеар, гувернерот на Илиноис, Џеј Би Прикер и секретарот за транспорт, Пит Бутиџиг, велат изворите.
– Тимот се сретна со Шапиро во средата – рекол изворот и додал дека на тој состанок не присуствувал потпретседателот на САД.
Тимот се состана со сенаторот Кели во вторник попладне, а Прикер разговараше со тимот на Камала Харис три часа во понеделникот.
Се очекува Харис да одлучи кој ќе биде потпретседател до понеделник.
Нејзината кампања, исто така, планира да ја објави одлуката на социјалните мрежи, изјавија за Ројтерс извори запознаени со планирањето на изборот за потпретседател.
Кампањата на Камала Харис ги ангажираше поранешниот американски јавен обвинител Ерик Холдер и адвокатската фирма Covington & Burling за истражување на потенцијалните кандидати за потпретседател.
– Ја завршија работата и ги доставија своите заклучоци – изјавил изворот за Ројтерс.
Се очекува Харис и нејзиниот нов партнер во вторник да тргнат на четиридневна турнеја која ќе посети шест локации, вклучувајќи ги западниот дел на Висконсин, Детроит и Лас Вегас.
Текстот Тимот на Камала Харис се сретна со шест потенцијални кандидати за потпретседател е превземен од МАКФАКС.
