Основното јавно обвинителство Скопје донесе наредба за спроведување истражна постапка против 25-годишник за кого постои основано сомнение дека сторил кривично дело убиство според член 123 став 1 во врска со член 19 (во обид) од Кривичниот законик.
На 17 јули, во вечерните часови во Чаир, осомничениот со мотор со голема брзина поминал покрај оштетениот и уште едно лице, кои се движеле пеш, и ги испрскал со вода насобрана на асфалтот. Застанал и му се извинил само на сведокот, а со оштетениот најпрвин почнал да се расправа, а потоа и физички размениле неколку удари.
Осомничениот најприн избегал, но потоа ги пречекал во близина на детската градинка „Фидани“ и со пиштол испукал еден куршум кон оштетениот нанесувајќи му огнострелна повреда во десната страна на градниот кош и оштетувајќи му неколку органи. Сторителот веднаш повторно се дал во бегство.
Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот, а притворската мерка треба да се применува по неговото лишување од слобода. МВР постапува за пронаоѓање на осомничениот.
Текстот Скопјанец осомничен за обид за убиство, полицијата трага по него: ги испрскал со вода од асфалтот, а потоа ги пречекал и пукал со пиштол е превземен од МАКФАКС.
