Ракометарите на Шпанија се пласираа во полуфиналето на Олимписките игри откако во четвртфиналниот меч ја совладаа селекцијата на Египет со резултат 29:28. „Црвената фурија“ во продлженијата го елиминираше Египет, кој во најголемиот дел од натпреварот беше подобриот тим на теренот.
Селекцијата на Египет одлично влезе во натпреварот. Таа поведе со 4:2, но Шпанците тргнаа во серија од 3:0 и првпат поведоа со 5:4. Египет експресно ја врати предноста од два гола, а првите 30 минути ги заврши со серија од 4:0 за плус четири на пауза, 12:8.
Селекцијата на Египет ја задржа предноста во продолжение. Шпанците не успеаја да направат серија но трпеливо ја топеа предноста на противникот.
Тарафета во финишот озедначи на 25:25, а последниот напад на Египет во регуларниот дел не беше успешен.
Во продолженијата пресуди искуството на Шпанците и најдобриот играч во нивните редови, голманот Де Варгас.
Откако Гомез реализира седмерец за 29:28, Де Ваграс го одбрани ударот на Елдера во последниот напад на мечот.
Гомез беше најефикасен кај Шпанците со девет гола, но главна ѕвезда е неверојатниот голман Гонзало Перез де Варгас, кој имаше 17 одбрани.
Кај Египет најефикасен беше Јехиа Елдера со осум постигнати голови. Голманот Мохамад Али имаше 12 одбрани.
Текстот Де Варгас ја спушти „ролетната“ – Шпанија го елиминира Египет е превземен од МАКФАКС.
