Либерално-демократската партија (ЛДП) изразува загриженост за случувањата во скопската Зоолошка градина и бара одговорност во врска со последниот скандал на смртта на слоницата Даела.
„Бидејќи не станува збор за прв случај, да потсетиме дека само пред некој месец пцовисаа жирафите, тигрицата, пингвин, тука е и кланицата на расните коњи, а прашање на време е кое животно ќе биде следно со оглед на третманот и условите што ги добиваат животните од страна на директорот и менаџментот на Зоолошката градина под директно управување од градоначалничката Данела Арсовска и Град Скопје“, велат од ЛДП.
Оттука, ЛДП бара итно расчистување на случајот и транспарентност од страна на надлежните органи во врска со овие инциденти сѐ со цел да се гарантираат безбедноста и благосостојбата на животните во Зоолошката градина, но и на посетителите што го користат ова место за рекреација.
Либерално-демократската партија (ЛДП) бара оставка од градоначалничката на Скопје, Данела Арсовска, поради, како што велат, нејзиното катастрофално менаџирање на градските институции и неспособност да се справи со проблемите на градот.
Според ЛДП, проблемите не се само во ЗОО Скопје.
„Скопјани сведочат на секојдневни проблеми со хигиената, парковите и нивното одржување, ЈСП се претвори во претпријатие без автобуси со зголемени долгови од месец на месец. Лошото управување на јавните претпријатија под нејзина надлежност се главни причини за ова барање“, додаваат од ЛДП.
Текстот ЛДП: Проблемите не се само во ЗОО Скопје, оставка од Арсовска поради нејзиното катастрофално менаџирање на градските институции е превземен од МАКФАКС.
