Кина го поддржува Иран во одбраната на неговиот „суверенитет, безбедност и национално достоинство“, му рекол кинескиот министер за надворешни работи Ванг Ји на вршителот на должноста министер за надворешни работи на Иран во телефонски разговор, се вели во соопштението на кинеското Министерство за надворешни работи.
Во телефонски разговор, Ванг ја повтори осудата на Пекинг за атентатот на лидерот на Хамас Исмаил Ханије на 31 јули во Техеран. Тој рече дека нападот го нарушува суверенитетот на Иран и ја загрозува регионалната стабилност.
Иран и палестинската исламистичка група Хамас го обвинија Израел дека го извршил нападот во кој загина Ханије. Израел не ја презеде одговорноста за убиството, но не ги отфрли обвинувањата, што ги подгрева стравувањата дека конфликтот меѓу Израел и Хамас во Појасот Газа може да се прошири на поширокиот регион на Блискиот Исток. Иран вети дека „жестоко ќе го казни“ Израел за атентатот.
Ванг му кажа на Али Багери Кани, вршител на должноста министер за надворешни работи на Иран, дека убиството на Ханије „директно го поткопа преговарачкиот процес за прекин на огнот во Газа и го загрози регионалниот мир и стабилност“, соопшти кинеското Министерство за надворешни работи.
„Кина го поддржува Иран во одбраната на својот суверенитет, безбедност и национално достоинство во согласност со законот, како и во неговите напори за одржување на регионалниот мир и стабилност и е подготвена да одржува блиска комуникација со Иран“, рече Ванг.
Иранскиот претседател Масуд Пезешкијан во неделата го назначи Абас Аракчи за министер за надворешни работи.
Текстот Кина го поддржува Иран: „Ќе ги одржите мирот и стабилноста во регионот“ е превземен од МАКФАКС.
