Партијата Левица го критикува новиот министер за односи меѓу заедниците, Иван Стоилковиќ, за наводната транспарентност на неговото министерство. Според соопштението на Левица, иако Стоилковиќ пред еден месец го претстави списокот на вработени во поранешното министерство на Артан Груби како дел од својата ПР-стратегија, идентитетот на вработените сè уште останува скриен од јавноста.
Левица објави дека нејзиниот Сектор за Политички систем испратил барање за информации од јавен карактер до Министерството за односи меѓу заедниците, барајќи детали за раководителите, вработените и советниците, вклучувајќи ги и нивните службени е-адреси. Министерството законски е обврзано во рок од 20 дена да одговори на барањето, но, според Левица, до денес не добиле никаков одговор.
„Зошто власта го крие идентитетот на вработените во Министерството за односи меѓу заедниците?“ прашуваат од Левица, додавајќи дека транспарентноста на Стоилковиќ е само за пред медиумите и служи за дневнополитички поени на ДПМНЕ. Партијата истакнува дека, и покрај најавите за промени, министерството продолжува да функционира како досега, задржувајќи го списокот на вработени и другите контроверзии под превезот на тајност. Левица најави дека ќе поднесе жалба до Агенцијата за слободен пристап до информации од јавен карактер.
Текстот Левица: Зошто власта го крие идентитетот на вработените во Министерството за односи меѓу заедниците? е превземен од МАКФАКС.
