Војската на Израел денеска нареди нова евакуација во јужниот и централниот дел на Појасот Газа, кои претходно беа означени како хуманитарна безбедна зона, велејќи дека Хамас ги користи овие области како база за да истрела минофрлачи и ракети врз Израел.
СМС пораки и предупредувачки летоци биле испратени до областите северно од градот Кан Јунис и во источниот дел на градот Деир Ал-Балах, каде што десетици илјади луѓе побарале засолниште од борбите во други делови на Газа.
„Однапред е издадено предупредување до цивилите за да се ублажи штетата врз цивилното население и да се овозможи на цивилите да се оддалечат од борбената зона“, се вели во соопштението на армијата.
Војската претходно соопшти дека ја погодила областа во Кан Јунис од каде во четвртокот биле истрелани ракети врз заедницата Кисуфим и таму открила ракетно оружје и експлозиви.
Последните предупредувања за евакуација дојдоа додека преговарачите треба да се сретнат во Доха на вториот ден од разговорите со цел да се постигне договор за прекин на огнот во Газа и ослободување на израелските и странските заложници.
Повеќето од 2,3 милиони жители на Газа повеќе пати се раселуваат од почетокот на израелската офанзива во Газа, започната по нападот на Израел на 7 октомври, предводен од Хамас.
Текстот Израелската армија нареди евакуација во хуманитарната зона во Газа е превземен од МАКФАКС.
