Северна Кореја повторно ќе ги отвори своите граници за туристи на крајот на 2024 година откако ги затвори пред пет години поради пандемијата на Ковид-19, објавија две туристички компании кои работат со оваа земја.
„Корио турс“, со седиште во Пекинг, и „КТГ турс“ со седиште во Шенјанг, во средата објавија посебни онлајн-најави велејќи дека на туристичките групи ќе им биде дозволено да го посетат планинскиот град Самџијон, наводното родно место на починатиот севернокорејски лидер Ким Џонг-ил.
„Добивме потврда од нашиот локален партнер дека туризмот во Самџијон и, веројатно, остатокот од земјата официјално ќе продолжи во декември 2024 година“, изјавија од „Корио турс“ додавајќи дека деталите ќе бидат финализирани „во наредните денови и недели“.
Во посебна објава на „Фејсбук“, „КТГ турс“ исто така соопшти дека точните датуми на турите ќе бидат потврдени.
„Досега се споменуваше само Самџијон, но мислиме дека ќе се отворат и Пјонгјанг и други места“, се наведува.
Текстот Северна Кореја ги отвора границите за туристи по 5 години: дозволено им е само во еден град е превземен од МАКФАКС.
