Претседателот на Собранието Талат Џафери и претседателот на Албанија Илир Мета на денешната средба истакнале дека билатералните односи меѓу Северна Македонија и Република Албанија се на високо ниво и оти постои взаемен интерес и можност за унапредување на истите.
Притоа, на средбата било констатирано дека двете држави ги врзува искрено пријателство и соработка кое во иднина се очекува уште повеќе да се зајакнува и унапредува, бидејќи и на меѓународен план имаат исти цели и интереси, односно полноправно членство во Европската Унија, безбедносна соработка во рамките НАТО и продлабочување на регионалната соработка.
Имајќи предвид дека Република Албанија, од 1 јануари оваа година е непостојана членка на Советот за безбедност на Организацијата на обединетите нации, претседателот Џафери упатил искрени честитки.
Исто така, како што соопштија од Собранието, Џафери истакнал дека нашата држава останува целосно посветена на определбите за европска интеграција и посветено работи на регионална соработка.
Како приоритети од заемен интерес Џафери ги посочил поефикасното искористување на ЕУ фондовите, заедничкото учество во нови проекти во рамките на ИПА 2, но пред сè, работењето на продлабочување на економската соработка преку промоција на стопанските потенцијали и реализација на инфраструктурните проекти кои се значајни за напредокот и стабилноста на Република Северна Македонија и Република Албанија. Тој го информирал соговорникот за најновите случувања во земјата по одржувањето на локалните избори во земјата како и за изборот на новата Влада што треба да се случи во текот на оваа недела.
Претседателот Мета истакна дека во Северна Македонија има консолидирани демократски процеси и дека земјата ги исполнила сите обврски за отворање на преговорите за членство во Европската унија но сепак тоа не се случило. Изрази надеж дека што поскоро ќе се надминат недоразбирањата со Република Бугарија и ќе се создадат услови за одржување на Првата меѓувладина конференија за почеток на преговорите за членство во ЕУ.
На крајот, двајцата соговорници се согласиле дека во иднина е потребна уште поголема меѓусебна соработка и поддршка, пред сé заради енергетската и економската криза која се очекува оваа година да се продлабочи.
