Министерот за здравство Беким Сали по денешното преземање на функцијата од Венко Филипче, изјави дека длабоко е свесен за огромната одговорност што ќе ја има како министер за здравство особено во период во кој се соочуваме со најголемиот предизвик – пандемијата и нејзините последици.
– Предизвици во здравството постоеле отсекогаш и јас, како министер, ветувам дека силно ќе се посветам на заложбите да го пополнуваме јазот меѓу здравството какво што е и здравството какво што сакаме да биде. Ќе продолжам таму каде што застанале моите претходници, уважувајќи ја нивната работа, но и детектирајќи го тоа што допрва треба да биде адресирано. Ќе сторам се’ што е во моја моќ здравствениот систем да биде што помалку ранлив, а што повеќе издржлив на предизвиците со кои се соочуваме и со тие со кои допрва би се соочувале. Создавањето силен здравствен систем за мене претставува добро и сеопфатно дефинирање на проблемите и системските недоследности и координиран и навремен пристап околу решенијата, истакна Сали.
Посочи дека приоритети во неговата работа како министер ќе бидат, пред се’, превенцијата и еднаквиот пристап до квалитетни здравствени услуги, зголемувањето и зајакнувањето на капацитетите во здравствениот систем и доброто раководење со нив, како и координацијата и конзистентноста во унапредувањето и спроведувањето на политиките на работа. Освен тоа, потенцира Сали, бескомпромисно ќе се залагам за подобрување на статусот и условите во кои функционираат здравствените работници и медицинскиот персонал.
– Во сево ова клучна е координацијата и соработката на сите нивоа и со сите релевантни чинители. Работејќи заедно ќе си помогнеме и себеси и на граѓаните. Во ниту еден момент не смееме да заборавиме дека зад секоја статистика се наоѓаат граѓаните, кои се најдиректно засегнати од тоа што се случува во здравството. Мојата работа ќе ја вршам максимално транспарентно, одговорно и со отворен пристап во комуникацијата со јавноста, а пред се’ со вас медиумите, кои играте клучна улога во правилното, навремено и урамнотежено известување на граѓаните, додаде министерот за здравство Беким Сали.
