Американскиот претседател Џо Бајден остро ја критикуваше 16-годишната затворска казна за американскиот новинар Еван Гершкович изречена од рускиот суд во петокот, велејќи дека Русија го прогонува „затоа што е новинар и Американец“.
Во соопштението објавено од Белата куќа, Бајден рече дека Гершкович „не извршил никакво злосторство“, додавајќи дека американската влада ќе продолжи да се бори за ослободување на новинарот на „Волстрит журнал“, како и за ослободување на сите американски граѓани незаконски приведени во странство.
„Новинарството не е кривично дело“, рече Бајден, додавајќи дека и тој и Обединетите нации рекле дека Русија незаконски приведува новинар.
„Ќе продолжиме цврсто да ја поддржуваме слободата на печатот во Русија и во светот и да се спротивставуваме на оние кои сакаат да ги напаѓаат медиумите или да ги прогонуваат новинарите“, рече американскиот претседател.
Одлуката на рускиот суд ја осудија и германската министерка за надворешни работи Аналена Баербок и британскиот премиер Кир Стармер.
Journalismus ist kein Verbrechen und die Wahrheit lässt sich nicht wegsperren. Die Verurteilung Evan #Gershkovich|s zeigt Putins Angst vor der Kraft von Fakten. Das Urteil ist politisch motiviert und Teil von Putins Kriegspropaganda. #FreeEvan
— Außenministerin Annalena Baerbock (@ABaerbock) July 19, 2024
Баербок ја опиша одлуката на рускиот суд како „политички мотивирана“.
„Новинарството не е криминал, а вистината не може да се затвори“, напиша таа на социјалната платформа Х.
Таа рече дека пресудата покажува дека рускиот претседател Владимир Путин „се плаши од моќта на фактите“, а пресудата ја нарече „дел од воената пропаганда на Путин“.
The sentencing of @WSJ reporter Evan Gershkovich is despicable and only serves to underscore Russia’s utter contempt for media freedom.
Journalism should not be a crime.
Gershkovich must be released immediately.
— Keir Starmer (@Keir_Starmer) July 19, 2024
Стармер ја опиша 16-годишната затворска казна како „одвратна“ и повика 32-годишниот новинар „итно да биде ослободен“.
Пресудата „служи само да го истакне целосниот презир на Русија кон слободата на медиумите“, напиша Стармер на Икс.
Текстот Бајден за пресудата против новинарот на Волстрит журнал: Русите го прогонуваат затоа што е Американец е превземен од МАКФАКС.
