Првиот „Селфи музеј” во нашата земја денеска е отворен во Скопје Сити Мол. Посветен на современата визија на автопортретот и љубителите на социјалните мрежи, „Селфи музејот” е простор од 250 метри квадратни дизајниран со интересен ентериер и 18 различни содржини на кои посетителите ќе може да создаваат уникатни фотографии и видеа за социјални мрежи.
„Селфи музејот” е направен по примерот на селфи музеите низ светот и нуди содржини пригодни за сите возрасти и различни интереси. Посетителите може да се фотографираат и забавуваат, во друштво или сами со оглед на тоа има поставено триподи за самостојно фотографирање, како и лице задолжено за поддршка на посетителите.
-Ги следиме светските трендови и секогаш нудиме незаборавни искуства за посетителите од сите генерации – за шопинг, дружба и забава. Со Селфи музејот, сместен на први кат во Скопје Сити Мол им овозможуваме на посетителите да направат сопствени уникатни фотографии за социјални мрежи и да се забавуваат во омилениот трговски центар. И во годината кога Скопје Сити Мол го слави десеттиот роденден остануваме посветени да им обезбедиме на нашите посетители, партнери и пријатели сѐ што им треба на едно место, изјави маркетинг менаџерот на Скопје Сити Мол Дамјан Корубин.
Селфи музејот е со времен карактер и ќе биде отворен до 10 март оваа година, секој ден од 10:00 до 22:00 часот, односно во недела до 20:00 часот. Поради мерките за заштита од Ковид-19 дозволен број на посетители во исто време е 15.
Цената на влезницата е 100 денари, или 360 денари за четворица посетители.
