Претседателот на Белорусија, Александар Лукашенко, голем сојузник на рускиот претседател Владимир Путин, почна отворено да зборува за можноста Русија да се распадне.
Тој го изјави ова во Минск, на состанокот на Советот на министри за внатрешни работи, заедница на земји што ги вклучува главно земјите од поранешниот СССР.
„Можеби ниту една од нашите земји нема да може без ова единство. Ако не го разбереме ова денес, тие ќе се занимаваат со нас одделно. Но, ако Русија се распадне, сите ќе бидеме вовлечени во вителот“, рече белорускиот лидер.
Шефот на државата на средбата ја истакна важноста на единството и соработката во ЗНД и предупреди на обидите да се бараат краткорочни придобивки.
„Во светло на неодамнешните настани, вклучително и специјалната воена операција во Украина, многумина, и лидерите и безбедносните службеници, почнаа да бараат некаква корист за себе. Тоа не треба да биде случај“, рече Лукашенко.
„Врз основа на моето искуство, ќе кажам дека животот е многу турбулентен и променлив сега. Многумина бараат придобивки и се оддалечуваат од нашиот општ тренд на развој создаден во советската ера. Некои мислат: ‘Ќе се држиме подалеку од Русија, таа е под санкции, се плашиме да не дојдеме под нив и така натаму… Ние ги бараме нашите интереси’. Не правете го тоа“.
„Кој знае што ќе се случи утре со нас, со нашите земји и дали ќе треба да се обратиме до Русија за помош. Последните настани покажуваат дека никаде не сме добредојдени. Или Русија, или ние. Мораме да се држиме заедно“, рече шефот на Белорусија.
Текстот Лукашенко почна да го спомнува распадот на Русија е превземен од МАКФАКС.
