Министерката за одбрана, Славјанка Петровска денеска имаше средба со францускиот амбасадор во Северна Македонија, Сирил Бомгартнер. Заклучокот од средбата е дека и двете држави имаат блиска и плодна соработка во одбраната, а на оваа соработка и претстојат и нови и интересни перспективи во иднина зашто и двете земји се исклучително посветени на тоа, информираат од прес-службата на МО.
Од Министерството велат дека Петровска говорела за заедничката безбедносна и одбранбена политика на Унијата, при што посочила дека Северна Македонија дава свој придонес во оваа сфера. Имајќи предвид дека Франција е претседавач со Европската Унија првата половина од годинава, министерката ја истакнала потребата за брз почеток на преговорите за членство во Унијата.
– Северна Македонија направи исклучително голем прогрес и потребно е Унијата да го направи следниот чекор кој ќе биде силна мотивација за уште поголем развој. Земјава ги почитува и поддржува европските политики и нашето место е во Европската Унија. Последните неколку години направивме многу, реформите се видливи и затоа заслужуваме да го започнеме пристапниот процес, истакнала Петровска.
Бомгартнер порачал дека Франција целосно ја поддржува Северна Македонија на патот кон Унијата и оти пристапните преговори треба да почнат што е можно поскоро.
Соработката помеѓу двете земји и двете армии, велат од МО, може да се види и преку заедничките обуки и заедничкото учество во воени вежби. На претстојната најголема воена вежба досега организирана во земјава „Swift Response 22″ ќе учествуваат и француски војници.
Двете држави активно соработуваат и во доменот на јазичната обука и школувањето на припадници на Армијата на Република Северна Македонија на највисоките воени школи во Франција.
