Претседателката Гордана Сиљановска-Давкова, денеска, на Воената академија „Генерал Михаило Апостолски“ во Скопје се обрати на свечената промоција на 24. класа питомци во првиот офицерски чин – потпоручник, слушателите на курсот за офицери на служби во почетен офицерски чин – поручник и слушателите на основниот курс за подофицери во првиот подофицерски чин водник.
Во своето обраќање претседателката Сиљановска-Давкова пред питомците истакна дека тие стануваат офицери во период на глобална неизвесност, на геополитички тензии, на воени конфликти и дека како офицери на НАТО-армијата од нив се очекува да ги исполнуваат највисоките професионални стандарди и врвни критериуми.
Претседателката изрази уверување дека тие активно ќе учествуваат во справувањето со традиционалните и новите асиметрични и хибридни закани во физичкиот и сајбер-просторот и дека ќе треба да придонесуваат за колективната безбедност и одбрана преку учество во мировни мисии и операции, да ја одржуваат борбената кондиција на меѓународните воени вежби со нашите сојузници и стратешки партнери.
Во рамките на свечената промоција претседателката Сиљановска-Давкова на потпоручник Милица Перишиќ од Црна Гора ѝ додели плакета за најдобар успех во 24. класа питомци на Воената академија „Генерал Михаило Апостолски“.
Текстот Сиљановска-Давкова на свечената промоција на офицери и подофицери: Со вашиот патриотизам и професионализам треба да бидете пример за македонското општество е превземен од МАКФАКС.
