Ниту во обвинението, ниту од доказите не се покажа кои дејствија ги презел Миле Јанакиески и за кое кривично дело, пред кои органи и спротивно на која законска одредба, изјави во завршен збор за случајот „Топлик” бранителот на екс министерот Јанакиесеки, адвокат Еленко Миланов.
Миланов на Судот му предложи да донесе ослободителна пресуда за Миле Јанакиески, со оглед на, како што рече, тоа дека не постојат елементи на сторување на кривичното дело.
– Постојат сите потребни документи согласно законот за градежно земјиште и уредбата за постапување. Денеска застапникот на обвинението сакаше да убеди дека делото е сторено со тоа што Комисијата доставила информација за објава. Но, господа судии во оваа информација стои дека се исполнети услови за издавање на објава, изјави Миланов.
Во однос на елементот на штета, тој рече дека исплата на законска затезна камата се применува за секое задоцнување или користење туѓи средства и не може да претставува кривично дело.
– Во 2019 година две милијарди денари по овој основ. Исплатата на законска затезна камата од државните органи не може да претставува елемент на штета, рече Миланов.
Бранителот на Миле Јанакиески, адвокатката Сања Алексиќ, во завршен збор претходно рече дека Јанакиески не учествувал во работата на Комисијата и не може да стане збор за соучесништво, што се покажува од исказите на самите членови.
Од доказите, рече таа, се гледа дека Јавниот обвинител не ја докажа неговата теорија на случај дека Јанакиески и покрај тоа што знаел дека има недостатоци склучил договор со „Сан сити”, кој потоа не можел да се спроведе во Катастар.
– Укажуваме на Судот дека од изнесените докази неспорно може да утврди со што бил запознаен Јанакиески, а тоа е извештајот на втората Комисија, кој е адресиран до него и со кој Комисијата го известува дека се исполнети условите и предлага да се склучи договорот со “Сан Сити”. Истовремено не се докажа дека во моментот на потпишување министерот знаел дела договорот не може да се реализира, изјави Алексиќ.
Таа, исто така, рече дека не се докажале и наводите на ЈО дека со склучената спогодба со „Сан Сити” и исплатената штета од еден милион евра е оштетена државата, туку напротив постигнат е успех за државата со тоа што е вратен влогот и државата исплатила само камата за две години, а инвеститорот се откажал од понатамошна тужба.
Случајот го води судијата Осман Шабани.
Претходно денеска завршни зборови за случајот даде и јавниот обвинител Бурим Рустеми.
Во случајот „Топлик” првообвинет е ексминистерот за транспорт и врски, Миле Јанакиески, кој заедно со уште пет лица од министерството кои биле членови на Комисија за јавни наддавања, се обвинети за злоупотреба на службената положба и овластувања.
Предметот, кој беше отворен од поранешното СЈО се однесува на продажба на градежо земјиште за изградба на населбата Сончев Град во Сопиште.
