Сведоците Емил Димитриев, Ирена Мишева, Борче Георгиевски и Лазо Малијански, предложени од одбраната во случајот „Плацови на Водно” беа сослушани денеска во Основниот Кривичен суд – Скопје.
Поранешниот претседател на Владата на Република Северна Македонија, Емил Димитриев, рече дека не забележал нерегуларности во економското работење на ВМРО-ДПМНЕ во периодот кога извршувал функција генерален секретар на партијата.
– Во тој период кога ја извршував функцијата генерален секретар немам забележано никакви нерегуларности во однос на работењето на политичката партија. Не можам да кажам дека имало забелешки кои би имале некоја правна последица, посочи тој.
Тој се согласи со прашањето дека Никола Груевски никогаш не побарал од него да земе пари на рака од некоја донација, или дека има слушнато од некое трето лице истото да го побара. Исто како и за прашањето во врска со тоа дали Груевски интервенирал преку него, како генерален секретар, и преку други, за некаква интервенција во Генералниот урбанистички план на Скопје.
Сведокот Борче Георгиевски, поранешен советник на Град Скопје, рече дека расправата на Град Скопје при носење на ГУП-от е процедура која апсолутно се води според деловникот.
– Процедура која апсолутно се води спрема деловникот, преку комисиите, во една нормална демократска дискусија, меѓутоа, колку што можам да се сетам дека немаше апсолутно, дури мислам дека имаше голем број на гласови кои што се донесоа на тој совет во однос на прифаќање на ГУП-от, посочи тој, при што дополни дека немал никаков притисок при изгласување на истиот.
Ирена Мишева, своевремено претседател на Совет на Град Скопје, сподели дека подготовка на ГУП-от е започната некаде 2005-2006 година.
– Тогаш се случи нова територијална поделба на РМ, и согласно тоа, ГУП-от требаше да претрпи одредни измени, постапката е започната во 2005-2006 година, бидејќи се работи за многу обемен документ во кој се вклучени многу институции, трае многу долго и овој ГУП финишираше со неговото донесување во 2012 година и согласно законот се донесе во две фази, прво нацрт фазата, потоа одлуката за ГУП на Град Скопје, појасни таа.
На прашање како течела расправата на Советот на Град Скопје при донесувањето на ГУП-от, таа сподели дека советот броел 45 членови.
– Од она што се сеќавам и пред малку и напоменав, Советот на Град Скопје брои 45 членови, јас точно можам да ви кажам во мандатите, кои, колку, имало советници на ВМРО-ДПМНЕ. Она што можам да го кажам дека тој совет беше многу шаренолик совет од многу политички партии, рече таа.
Мишева, исто така, се согласи дека никогаш не ѝ била дадена наредба како да гласа при носење на тој ГУП, дали лично или преку некое трето лице.
– Никогаш, ама баш никогаш, Никола Груевски ми се нема јавено ниту за едно прашање, за една тематика, под целосна граѓанска, кривична, материјална одговорност отфрлам какво било толкување дека некој ми се јавил, особено господинот Никола Груевски, рече таа.
На Прашање од претседателот на Советот, дали кога го гледале и кога работеле на ГУП-ит не ги интересирале и не знаеле кои се сопственици на одредени парцели на Град Скопје, таа истакна дека како советници, немаат увид во ДУП-овите, туку тие се во надлежност на матичните општини.
На денешното рочиште сведочеше и сведокот Лазо Малијански, геодетски инженер кој го образложи неговиот ангажман за изработка на геодетски елаборат за конкретната парцела за која рече дека смета дека се запазени сите законски постапки, а за понатамошното како е тој искористен, нема податоци.
– Јас го разгледав овој геодетски елаборат. Истиот е изготвен согласно позитивните законски прописи, барател за геодетскиот елаборат била фирмата „Life Care” и се однесувало за барање за физичка делба во реален дел на земјиште. Најчесто физичка делба во реални делби се бара кога се има потреба да се склучуваат договори за купопродажба или за поклони. Наназад, за такви физички делби во реални делови служеле тапиите, потоа скици од претходна постапка кои служеле за договарање. А откако е воведена геодетската пракса служат геодетите, посочи тој.
За да сможе да се изработи геодетски елаборат за физичка делба, како што рече, има предуслови, а тоа се, земјиштето да не е земјоделско, или ако е земјоделско да е поголемо од 20 илјади километри квадратни. Друг услов е земјиштето да е градежно и со намена за индивидуално, стабилно живеење.
– Во овој случај, исто така, не е побарано да се изврши поделба на градежна парцела бидејќи градежна парцела и не може да се дели, односно, градежната парцела може да се дели само со измени на ДУП или со нов ДУП, рече Малијански.
Дел од предложените сведоци на одбраната не беа присутни на денешната расправа со што нивното сослушување се одложи за следното насрочено рочиште на 23 февруари.
Според обвинението за овој случај, Никола Груевски е обвинет за делата „перење пари и за противправно стекнување и прикривање на имот”. Неговиот кум, Ристо Новачевски, бизнисмените Ненад Јосифовиќ, Јордан (Орце) Камчев и Ратка Куновска Камчева се товарат за „перење пари”, а првиот братучед на Груевски и поранешен директор на УБК, Сашо Мијалков, е обвинет за „помагање при кривично дело перење пари и други приноси од казниво дело”.
Случајот го води судијата Илија Трпков, а застапник на обвинението е обвинителката Лиле Стефанова.
