Медиумската информативна агенција – МИА е добитник на Наградата за филантропија за 2021 година во категоријата за медиуми за посебен придонес кон развој на филантропските практики во Северна Македонија.
Наградата во име на Агенцијата ја прими директорот Драган Антоновски кој истакна дека е задоволен што во општеството се забележува работата на МИА.
– Последниве години ние се свртевме повеќе кон обичните луѓе, кон граѓанскиот сектор, кон потребите на граѓаните. Ги пренесуваме информациите од државните инситуции, но даваме и доволно простор за она што значи граѓански активизам, невладин сектор, рече Антоновски.
Тој најави дека деновиве МИА ќе отвори прес-центар кој ќе може да го користат сите, но пред се, граѓанските организации за промовирање на нивните активности, од каде медиумите ќе добијат комплетна агенциска инфомација со видео и фото материјал.
– Зголемена е продукцијата на МИА. Сега произведуваме околу 14.000 вести месечно или околу 300-400 вести во текот на еден ден. Така што тука има простор за сите и мислам дека придонесуваме кон она што значи јавен интерес и кон она што значи проверено, брзо и точно информирање, особено кога сите знаеме дека живееме во ерата на лажни вести и се она што е провокација на нашата професија, вели Антоновски.
Бранко Докузовски, извршен директор на Здружението „Хорус”, кое е членки на SIGN – регионалната мрежа на локални фондации од Западен Балкан која ги доделува наградите, ја нагласи важноста на улогата на медиумите во промоцијата на филантропијата и филантропските практики и културата на донирање, а изборот на МИА произлегува од анализата на медиумските објави и нивното систематизирање во земјава.
Годинава имало 42 номинации за наградите кои се доделуваат во шест категории – корпоративна филантропија, индивидуален филантроп од Македонија и дијаспората, за здружение и фондација за посебен придонес за развој на филантропските практики, за медиум за посебен придонес кон развој на филантропските практики, како и награда за воспоставено долгорочно стратешки партнерство помеѓу деловниот и граѓанскиот сектор.
Во делот на корпоративна филантропија наградени се три компании и тоа во областа на големи компании „Алкалоид” АД Скопје, на средни компании „Аутомакедонија” и кај мали компании „Кантри сајт”. Наградата за воспоставено долгорочно стратешко партнерство на деловниот и граѓанскиот сектор ја понесе компанијата „Окта”, „Шепасти ентузијасти” за филантропија во делот на здруженија и фондации, а добитници во сегментот на индивидуална филантропија од дијаспората се Дејан Аџиоски од Швајцарија и Борче Стаменов од Кавадарци – покренувач на иницијативата „Донирај компјутер”, кому ова му е втора награда.
Наградите за филантропија се реализираат во рамки на проектот SIGN Up for Impact (SUfI) имплементиран од организациите-членки на SIGN – регионалната мрежа на локални фондации од Западен Балкан, а финансиран од Европската унија и Балканскиот фонд за демократија. Ова е шста година како се доделуваат нгардите.
