Светските резерви на храна би можеле да бидат загрозени како домино ефект од руската инвазија на Украина, посочуваат хуманитерните организации кои нервозно ги набљудуваат блискоисточните и азиските нации кои се потпираат на земјоделскиот извоз од завојуваните страни, пишува германската агенција ДПА.
И Украина и Русија се клучни снабдувачи на земјоделски стоки, но жетвите сега се загрозени во Украина, а заглавени во Русија поради санкциите. Повеќе од половина од прехранбените производи што ги користи Светската програма за храна на ОН (WFP) во кризните региони потекнуваат од Украина.
– Веќе има 276 милиони луѓе кои страдаат од акутен глад во 81 земја, рече Мартин Фрик, директор на берлинската канцеларија на WFP. – Светот едноставно не може да си дозволи нов конфликт. Војната на (рускиот претседател Владимир) Путин не ја засега само Украина, каде предизвикува неизмерна трагедија, туку ефектите ќе се почувствуваат многу подалеку од нејзините граници, рече тој.
Египет – со своето население од 100 милиони, што ја прави најнаселена земја во арапскиот свет – најголемиот дел од пченицата ја увезува или од Русија или од Украина. Истото важи и за Тунис. Сиромашните луѓе во двете земји многу се потпираат на лебот како извор на исхрана. Тој е субвенциониран и затоа е релативно широко достапен.
Но, експертите во Тунис сега предупредуваат за зголемување на цените поради војната и земјата бара други извори на пченица, како Аргентина или Романија. Но, останува нејасно дали тие извори ќе можат да ја задоволат побарувачката.
