Комисијата за заразни болести препорача укинување на сертификатите задолжителни за влез во моловите, односно таму каде не е задолжително носење маски.
– Донесовме еден заклучок, а тоа е да се препорача укинување на сертификатите задолжителни за присуство во моловите, односно каде не е задолжително носење маски. Ова е еден чекор во насока на олеснување на рестрикциите, но секако за следнитот развој ќе бидеме многу внимателни, бидејќи не сакаме со нагло отфрлање на сите заштитни рестриктивни мерки да постигнеме неочекувани резултати, рече денеска на прес-конференцијата по состанокот на Комисијата, нејзиниот претседател Александар Петличковски.
Посочи дека дискутираат на многу теми, и за тоа како би можеле полесно и побрзо да стигнеме до комплетно ослободување од рестриктивните мерки.
Портпаролот на Комисијата, Злате Мехмедовиќ рече дека еден од битните процеси во насока на релаксирање на мерките, односно тоа што ќе им даде основа да ги релаксираат мерките, пред се е процесот на вакцинација, која кај нас е на многу ниско ниво – 41 процент од населението е целосно вакцинирано.
Во таа насока, потенцира д-р Мехмедовиќ, проблемите кои се детектирани како такви од страна на Комисијата за заразни болести преку Министерството за здравство резултираа во една сериозна кампања која почнува од денеска и подразбира закажување термини за сите граѓани кои имаат имаат нецелосна вакцинација или не примиле бустер доза, а спаѓаат во ризичните групи.
Тој нагласи дека во ризичните групи се граѓани на возраст над 65 години и имаат коморбидитети и тие кои се помлади од 65 години и имаат поголем број коморбидитети.
– Кај овие граѓани ќе стигне СМС порака која ќе ги извести за тоа дека треба во точно одреден термин да го посетат точно одредениот пункт за вакцинација каде ќе можат да бидат вакцинирани. Многу важно за функционирањето на овој процес е соработката меѓу јавниот и приватниот дел од здравствениот систем. Матичните лекари ќе бидат клучен дел од процесот и ќе бидат тие кои ќе ги потсетуваат своите пациенти дека треба да се јават на соодветниот термин. Здравствените домови ќе бидат местата каде ќе се вакцинираат граѓаните. Во насока на тоа да имаме поефикасна вакцинација на овие ризични групи, соработката меѓу овие два дела од системот ќе биде исклучително важна, рече Мехмедовиќ.
Тој посочи дека очекуваат да има навистина добар одговор меѓу граѓаните затоа што со вакво потенцирање на вакцинацијата особено во ризичните групи после овој бран на омикрон кој е во фаза на одминување, може да се каже дека тоа биле ризичните групи кои биле на најсериозен удар од оваа варијанта и дека со вакцинацијата ќе се успее да се спречат понатаму компликациите кои се јавуваат кај оваа група граѓани.
– Според пресметките кои ги добивме од „Мој Термин”, 260.000 граѓани спаѓаат во таа високо ризична група, рече д-р Мехмедовиќ и посочи дека од нив, 130.000 или примиле една доза или непримиле ниту една, а останатиот дел односно другата половина нема примено бустер доза. – Тоа е нешто на кое треба да се фокусираме за да може да го подигнеме квалитетот на имунитетот на популацијата и да биде основа за натамошно релаксирање на мерките, додаде Мехмедовиќ.
