Премиерот Еди Рама оцени дека Албанија има многу позајакната позиција во НАТО, додавајќи дека „неслучајно, ние сме земја во која се вложуваат значителни инвестиции во воената инфраструктура на НАТО”.
-Во тек е изградба на база на НАТО, а сме место каде што е сместена оперативната команда на американските сили во Европа. Така, поради сите овие причини, гледаме и слушаме со многу повеќе внимание од порано. Многу сум задоволен што со нашиот став во однос на кризата во Авганистан, стекнавме огромна почит во очите на целата меѓународна заедница, изјавил Рама, пренесува државната агенција, АТА.
Зборувајќи за војната во Украина, Рама рекол дека „вистина е оти Владимир Путин практично ја обедини Европа за неколку дена, враќајќи ја во златните времиња на нејзината заедница, барем како што сведочат сите оние кои ја познаваат добро историјата на Европа, не само од книгите туку и од нивните искуства”.
-Никогаш не можам да кажам дека го почувствував ова што дојде, бидејќи освен американската разузнавачка служба, никој друг не беше навистина убеден дека Путин ќе се обиде да изврши фронтална агресија и окупација на Украина, рече Рама.
Запрашан за посетата на Украина кога Албанија беше претседавач со ОБСЕ, Рама вели дека „всушност тоа беше апсолутно тензична ситуација”.
-Отидовме во зоната на конфликтот, каде што двете страни се разделени и каде што започнува областа на таканаречените две републики новопризнаени од Путин, а всушност беше ситуација како во оние холивудски филмови по апокалипсата, апсолутно надреална ситуација, со таа разлика што не беше филм, рече Рама.
Според него „Албанија денес е на врвот на својата надворешна политика поради извонредната позиција на највисоката маса на глобалната политика, во Советот за безбедност на Обединетите нации”.
-Не само тоа, туку е во извонредна позиција и поради фактот што САД побараа од Албанија да стане соносител на досието Украина. Резолуцијата усвоена со многу ретко мнозинство, во случаи од ваква природа, кога има конфликт од ваков обем, во Генералното собрание на ОН, беше резолуција иницирана од САД и Албанија, изјавил Рама.
